Нашите корени….

Социјалдемократскиот сојуз на Македонија како политичка партија е основана на 21 април 1991 година на 11 Конгрес на СКМ-ПДП кога врз основа на иницијативата на Претседателството на ЦК СКМ–ПДП од 14 февруари 1991 година и предлогот на Централниот Комитет на 23 февруари 1991 година е донесена и одлуката за промена на името од СКМ–ПДП во СДСМ.

Оттогаш па до денес СДСМ е модерна, демократска, социјалдемократска партија која своите корени ги влече од традиционалните левичарски идеи кои опстојуваат на оваа територија уште со одржувањето на Првата конференција на македонските социјалисти во Македонија на 3 (17) јуни 1900 година во селото Житоше - крушевско, постоењето на политичката група на Васил Главинов која ги дефинираше основните социјалистички гледања за ослободителната борба на Македонија како “дело на самите Македонци“ и создавање на независна македонска република со еднакви права на сите нејзини граѓани без оглед на етнички, верски, културни и други разлики.

Левите, социјалистички идеи имаа свои корени и во Македонската револуционерна организација како носител на модерната, прогресивна идеја за слобода и создавање на држава, независна и ослободена од влијанието на сите соседни пропаганди од надвор. Меѓу претставиците на левото крило во македонското револуционерно движење најзначајно место заземаат Гоце Делчев и Никола Карев.

Суштински напредок во формирањето на социјалистички и социјалдемократски организации беа постигнати по победата на Младотурската револуција (1908) кога во сите поголеми градски центри биле создадени вакви ограноци. И помеѓу двете светски војни овие идеи имаат значајно место и поддршка меѓу македонското население како автентичен претставник на македонското национално движење наспроти врховистичките пробугарски струи на чело со Ванчо Михајлов и Тодор Александров како пропагатори на идеите на бугарскиот двор и негатори на македонската нација.

Левичарската, социјалдемократска идеја беше најдоминантна и во Втората светска војна преку Комунистиката партија на Македонија која резултираше со првото заседание на АСНОМ на 2-ри август 1944 година и конституирањето на македонската држава и остварувањето на вековните стремежи за независност и слобода на македонскиот народ.

Токму од овие вековни идеи и традиции, денес СДСМ ги влече своите основи како модерна и државотворна партија која тежнее кон создавање на општество кое се базира на еднаквост, слобода, демократија, членство во евроатлантските интеграции, економски развој и солидарност.

Социјалдемократскиот сојуз од независноста па досега  го потврди својот државотворен карактер и имиџ на партија која секогаш националните интереси ги става пред партиските. Од првите парламентарните избори па досега, СДСМ зазема значајно место во политичкиот живот на Република Македонија . На првите парламентарни избори Социјалдемократскиот сојуз, тогаш сè уште под името СКМ-ПДП, освои 31 пратеничко место и го зазеде второто место по освоени мандати, но со огромно влијание во клучните моменти за македонската држава кога се носеше Уставот на Република Македонија и се создадоа државните институции.

СДСМ беше носител на првата политичка Влада на Република Македонија на чело со  претседателот на СДСМ Бранко Црвенковски како претседател на Владата. Оваа Влада ја одигра клучната улога во периодот на првите години на независност во состојба на ембарга, санкции и меѓународна изолација.

Како резултат на работата на Владата, Македонија беше примена во Организацијата на обидените нации и беше меѓународно призната под нејзиното уставно име од најголемиот број на држави. На внатрешен план, овој период беше период на реформи и воспоставување на пазарните принципи.

На вторите парламентарни избори во 1994 година СДСМ во коалиција со ЛП и СПМ во Сојузот на Македонија освои 85 пратенички места, од кои 59 како политичка партија и беше носител на новата Влада – повторно со Претседателот на СДСМ Бранко Црвенковски како претседател на Владата. На претседателските избори, кои се одржаа заедно со парламентарните избори, кандидатот на Сојузот на Македонија Киро Глигоров победи во првиот круг.

На локалните избори во 1996 СДСМ освои 54 градоначалнички места, со што се потврди како партија со најголема поддршка помеѓу граѓаните.

На парламентарните избори во 1998 година СДСМ освои 27 пратенички места и беше најголема опозициона партија во Собранието на Република Македонија. Во овој период од четири години СДСМ го потврди својот државотворен капацитет и во клучните моменти за време на конфликтот влезе во Владата на национално единство. Како партија беше потписник на Охридскиот рамковен договор на 11 август 2001 и подоцна негов најпринципиелен поддржувач.

На претседателските избори во 1999 година кандидатот на СДСМ Тито Петковски освои најголем број гласови во првиот круг, но во вториот изборен круг, по огромниот број нерегуларности, неправилности и кршења на изборните правила констатирани од сите релевантни меѓународни организации, претседателскиот кандидат Борис Трајковски беше избран за Претседател на Република Македонија.

На локалните избори во2000 година СДСМ во коалицијата „За Македонија заедно“ издвои убедлива победа со освојување на градоначалничките места во сите поголеми општини и покрај големиот број на нерегуларности. Овие избори беа предвесник на големата победа на парламентарнитер избори 2002 година.

На овие избори коалицијата предводена од СДСМ настапи под името „За Македонија заедно“ со заедничка листа и со освоени вкупно 60 места или 50% од бројот на пратеници во парламентот беше носител на новата Влада. Бранко Црвенковски како претседател на СДСМ беше избран за претседател на Владата која имаше за задача да ја стабилизира политичката, безбедносната и економската ситуација во државата и да го врати меѓународниот углед на земјата.

Во овој мандат, додека СДСМ со своите коалициони партнери беше во Владата, Македонија го доби кандидатскиот статус за членство во ЕУ и е пред вратите на НАТО.

На претседателските избори во2004 тогашниот претседател на СДСМ и претседател на Владата Бранко Црвенковски, со освоени повеќе од 550.000 гласови беше избран за Претседател на Република Македонија по убедливата победа над својот противкандидат Сашко Кедев. За нов претседател на Владата беше избран Хари Костов, а по вонредниот конгрес и изборот за претседател на Владо Бучковски тој стана новиот претседател на Владата во период 2004–2006 година.

На локалните избори во 2005 СДСМ во коалицијата „За Македонија заедно“ освои 38 градоначалнички места со најголем број освоени гласови на градоначалничките и советничките листи во државата.

На парламентарните избори во 2006 коалицијата „За Македонија заедно“ предводена од СДСМ освои 32 пратенички места со што партијата стана најголемата опозициона партија во државата.

На предвремените парламентарни избори, кои за првпат од осамостојувањето на Република Македонија се одржаа на 1 јуни 2008-ма година, коалицијата предводена од СДСМ освои 27 пратенички места.

СДСМ ги загуби локалните и претседателските избори во 2009-та година. Иако остварените резултати анализирани по разни параметри покажуваат намалување на соодносот со противникот и менување на расположението на граѓаните, тие не се доволни за победа на изборите.

СДСМ директно освои градоначалници во Струмица (прв круг), Куманово (прв круг), Охрид, Карпош, Вранештица (прв круг), Ново Село, Дебарца (прв круг), во Македонски Брод победи кандидатот кој ја доби партиската поддршка или во гласови: СДСМ за градоначалници освои 307.014 гласови за разлика од ВМРО ДПМНЕ кој освои 431.303 гласови. СДСМ за советничките листи освои 213.772 гласови или 328 советнички места наспроти ВМРО ДПМНЕ кои освои 492 советнички места или 307.701 гласови.

Во вториот круг на претседателските избори претседателскиот кандидат на СДСМ проф. д-р Љубомир Данаилов Фрчкоски освои 264.828 гласови наспроти неговиот противкандидат проф д-р Ѓорге Иванов кој освои 453.616 гласови.

СДСМ донесе одлука за самостоен настап. Остварувањето на приближен број гласови на нашите советнички листи со бројот на остварени гласови како колаиција на изборите во 2008-ма и добивањето на поголем број советнички места од локалните избори во 2005-та кога настапуваваме во коалиција, покажува дека СДСМ го валоризира сопствениот политички бренд и јасно го истакнува сопствениот политички идентитет.

На Првиот конгрес на СДСМ одржан на 20 април 1991 година за претседател на СДСМ беше избран Бранко Црвенковски кој на оваа функција остана сè до неговиот избор за претседател на Република Македонија во 2004 година. Во овој период тој трипати беше реизбран на функцијата Претседател на партијата. На негово место дојде Владо Бучковски на Вонредниот конгрес во ноември 2004 и остана до Вонредниот конгрес на 05 ноември 2006 година кога за претседател на СДСМ беше избрана Радмила Шекеринска. Освен претседател, СДСМ на своите редовни конгреси на секои четири години избира и генерален секретар, Централен одбор составен од 70 до 90 членови и Надзорен одбор со 9 членови.

На Деветиот конгрес кој се одржа на 24.05.2009 година во Скопје, Социјалдемократскиот сојуз на Македонија повторно го избра Бранко Црвенковски за претседател на партијата.

На СДСМ не се потребни мали промени, туку длабока реформа за да се спротивстави на актуелната власт предводена од ВМРО-ДПМНЕ, порача лидерот на СДСМ пред неговиот избор.

На СДСМ не и се потребни мали промени, туку длабока реформа, за да и се спротивстави на актуелната власт предводена од ВМРО-ДПМНЕ, порача лидерот на СДСМ  пред неговиот избор.

Конгресот го разгледуваше и извештајот од локалните и претседателски избори и ги констатираше оставките на членовите на Централниот и на Надзорниот одбор.

СДСМ својот IX-ти Конгрес го одржа во знакот на редефиниран визуелен идентитет со кој ставаме крај на неколкуте идеолошки застранувања. Основната карактеристика на редефинираниот визуелен идентитет на СДСМ е новата стилизирана црвена роза во која е вметнат симболот на европската социјалдемократија – стиснатата дланка.

На Десетиот конгрес на СДСМ, кој се одржа на 07.06.2009 година во Охрид, под мотото „Време е“ партијата преку своите 530 делегати ги избра новите членови на Централниот и Надзорниот одбор.

Во Централниот одбор кој брои 90 членови, над 80 проценти се нови имиња со просечна возраст под 38 години. Меѓу новите членови, кои во најголем дел се со високо образование има пет доктори на науки, 13 магистри и неколку докторанти.

Веднаш по изборот на новите членови Централниот одбор на СДСМ одржа конститутивна седница на која за секретар на партијата беше избран Андреј Петров, а за потпретседатели Гордан Георгиев, Зоран Заев и Зоран Јовановски. Избрани се и 17 членови на Извршниот одбор на партијата.

Партијата исто така формира работни тела, комисии со цел подобро извршување на своите обврски. Комисиите се стручни тела составени од експерти во своите области. Во рамките на СДСМ постојат Социјалдемократската младина на Македонија (СДММ) и Клубот на жени на СДСМ.

Социјалдемократската младина на Македонија претставува организациона структура на младите членови на СДСМ формирана на 09 ноември 1991 со свој Статут и организациона структура. СДММ се залага за активна промоција на младите луѓе во политичкиот процес на државата, за стимулирање, поттикнување и унапредување на условите на младите луѓе како во процесот на образованието, така и при вработувањето и целосно вклучување на младите во општеството. СДММ е член на повеќе интернационални младиски организации, а во рамките на партијата се избори за статутарна застапеност на најмалку 20% на млади луѓе во органите на СДСМ.

Клубот на жени е организациона структура на жените на СДСМ која има свои клубови во сите општински организации на СДСМ и градот Скопје. Со својата активност овој клуб во голема мера придонесе на рамноправна застапеност на обата пола од минимум 30% на кандидатските листи кое претставува и законска одредба.

Највисок орган на СДСМ е Конгресот на партијата, а СДСМ донесува Статут како највисок правен акт на партијата и Програмска платформа за работа во периодот помеѓу два редовни конгреса. СДСМ изработи своја политичка Програма, со што стана прва политичка партија во земјата кој донела програма.

СДСМ е модерна европска социјалдемократска партија која е носител на сите прогресивни социјалдемократски идеи во Европа и Светот. СДСМ негува одлични политичко-партиски односи со сите социјалдемократски и социјалистички партии во регионот, во Европа но и со голем број левоориентирани политички партии од целиот свет.

СДСМ е полноправен член на Социјалистичката интернационала - организација на социјалистичките и социјалдемократските партии во светот и придружен член на ПЕС - Партијата на европските социјалисти. Тоа само го потврдува значајното место на Социјалдемократскиот сојуз на Македонија во големо европско семејство.

СДСМ се менува. По поразот на последните парламентарни избори и изборот на новото раководство, СДСМ е цврсто решена да ги поправи своите грешки. Сите добронамерни критики се земени предвид и СДСМ учејќи на своите грешки ќе се изградува како модерна партија на чесни и одговорни луѓе која секојдневно со конструктивни предлози ќе настојува да се приближи до граѓаните и да ја стекне нивната доверба. Тргнувајќи од конгресните заклучоци, во наредниот период СДСМ посебно внимание ќе посвети на интересите на граѓаните, на грижата за секој член и за остварување на социјадемократските идеали.