Што ли уште не ни се случува во оваа наша јадна Држава? ДПМНЕ и сѐ е можно. 

Фрчат на сите страни: 

- убиства, затворања, парламентарни меници, пописи, писма до Брисел, лустрации, радиодифузии такси, донации од 1000 евра, технолошки вишок, решенија на извршители, а народот мирен како „бубалка” како да не е негова државата, само си гледа сеир, а нема егзистенција. Стварно сме жилав и издржлив народ кога можеме онака „демократски“ да гледаме и трпиме ваква невидена сиромаштија, а ништо да не преземеме, ниту пак да викнеме гласно – „што правите бре властодршци”, ни ја растуривте државата, уште ли ќе не молзите, до кога? 

Но, гласот на народот е фатен и залипнат од страотните заплашувања, уценувања и казнувања од власта преку извршителите кои се ноќна мора за народот и од нив не може да спие, но што порано ако се отпушти гласот тоа подобро, оти потоа ќе биде доцна. Оти како што тргнала работава, власта со Груевски на чело може и воздухот и водата да ни ја наплати и ќе бидеме како риба на суво. Оти Груевски и фамилијата „хероите на нашето време” егзистираат од плеќите на народот. 

Власта си има свои судии, лустратори кои само по нарачка работат, небаре оние неистомисленици што се судат и лустрираат се роба за продавање. 

Судските и лустраторските егзекутори со самото доаѓање на работа, прва работна задача им е, прво некого да осудат или лустрираат. Јас не знам зошто Груевски не донесе закон во Собранието тој да стане обвинител, а министрите судии и тие директно да ги судат сите оние кои во државата не им одговараат, барем тогаш судството ќе ни биде „поефикасно”, а со тоа ќе го исполниме едниот услов за прием во ЕУ. Исто така, власта може, бидејќи има мнозинство во Собранието, да донесе Закон за забрана за дуели и јавни дебати оти и онака не и се потребни. 

Но, ако стварно и искрено Ве интересира како власта ги доби изборите и ако сакате да се ослободите од сите купувачи на гласови дозволете да на следните избори падне оваа власт, за да можат сите тие да одговараат пред законите на Република Македонија. Но, на ова ќе рече Јанкуловска: „Ние работиме според Уставот и законите на оваа држава”, ама нема поднесено ниту една кривична пријава против луѓе или активисти од нејзината партија, посебно оние што се по јавните набавки во државните органи и институции. 

Тоа се методите на оваа власт, општо познати и затоа државата ни тоне, а се офајдуваат поединци, а сметката на крајот ќе ја плати народот. 

Но, сепак власта знае да работи и тоа две работи: да води досиеа и да зема кредити. 

Затоа народе, во оваа сиромаштија кој ќе преживее, ќе раскажува. 

 

Бранко Шемов од Кавадарци